Kedai Iban ti cukup likun sereta manah endur belelak bekau bekerja besari-sari. Sepiak ke kanan jalai Batu Kawah semak lampu tripik.
Nama makai d? Ka ketawa ninga lebuh bala Cina nanya nama utai ka deka diempa lebuh kitai bejalai lalu deka belelak enda lama ba sebelah kedai. Leka tanya tu meh suah nyadika tundi bala kitai lebuh udah mulaika diri ke rumah udah bekau nurun ke pasar. Di Kuching lebuh ka masu motoka dinga deh ada chapuh kedai sepiak bejaku enggau diri sama diri bejaku Iban. Endei...ko ati aku dalam din. Udah nya aku lalu beratika enggau silik nemu nya 100% kitai Iban muka kedai makai enggau ngirup sema nya. Naka meh pengaga ati beratika kitai mega ulih besemekih enggau urang bukai bisnes tu. Laban ati ka majak betelai deka nemu enggau silik agi kedai nya, aku lalu duduk sereta ngudar ai setin. Tu meh kedai Iban ka pemadu 'kreatif' ka udah dipeda aku laban nama utai ti kedeka ati bisi di mua kitai magang. Ka belagu serayaka makai pan ulih mega. Sigi cun amat kedai akih. Tau nguji meh kitai semua lebuh lepa pengawa duduk sereta ngelantang ka ati ba kedai tu. Anang enda nyukong bisnes kitai sebansa. All the best.
